मेरे कहे तै ब्याह करवा ले, के पाछे धूल बिटोलै गा
मैं मर गी तै सजन मेरे तू, किसके तलवे रोलै गा
दिखे बखत उठ कै ताता पानी तंनै करकै कोण नहवावेगा
सेवा करकै मुट्ठी भर कै तंनै सेज पै कोण सुवावेगा
दिखे 8 बजे सी भोजन करकै तंनै भोजन कोण जीमा वेगा
तेरा हांडे चून घला ढकनी मैं तू किस पै टूक पुवावेगा
हां मैं चाली ज्या स्वरग पुरी मैं तू, चारु कुण टटोलेगा
मेरे कहे तै ब्याह करवाले......
तेरी डग डग हाले नाड बुढ़ापा, दूना जोर पकड़ ज्यागा
सिर पै तेरै धोले आ ज़्या, कमजोरी त्योर पकड़ ज्यागा
हां इतना सा तो पकड़ लिया किमे इतना और पकड़ ज्यागा
दिके सच्चा तो तंनै जब जानू मेरे तू दिल का चोर पकड़ ज्यागा
तू बहरा हो ज़्या तेरे दांत टूट ज़्या फेर खाली जीभ पापोलेगा
मेरे कहे तै ब्याह करवाले......
दिखे सुबह उठ कै धार काढ़ कै ताता दूध धरा जा सै
रोटी जैसी आवै मलाई ज्यादा गर्म करा जा सै
दिखे श्याम होवे जब खा पी कै नै मटकी बीच धरा जा सै
सही सांझ सी जामन दे कै खाली हाथ फेरा जा सै
होय दही बिलो कै मक्खन काढ दे फेर खाली हाथ झकोलै गा
मेरे कहे तै ब्याह करवालै........
बिन बेटे तै अवधपुरी का ऊंट मटिला हो जागा
हां कुण तेरा ब्याह करवादे जब, नक्शा ढीला हो ज्यागा
दिखे लख्मीचंद के धोरै रह कै तू जबर रसीला हो ज्यागा
जे हो ज्यागा पुत्र साजन तू घणा हटिल्ला हो ज्यागा
हां मांगे राम मेरी बाता नै तू फेर पाछे तै तोलै गा
मेरे कहे तै ब्याह करवाले......
Comments
Post a Comment