कंश मुरख तन्नै पता नहीं तू किसका बन रह्या गढवाला

कंश मुरख तन्नै पता नहीं तू किसका बन रह्या गढवाला
इस लड़की कै लड़का होगा नाम धरै किरशन काला

भक्त उबारै दुष्ट संघारै सबसे बड़ा धाम बनकै
सतयुग मै हिरणाकुश मारा नरसिंघ रूप थाम्ब बणकै
त्रेता मै तू कालनेम तेरे काढ़े प्राण राम बनकै
किरशन बनकै तन्नै मारेगा, काढै सांस श्याम बणकै
ब्रज मै रास करण आवेगा, तेरी गैल बंधे पाला
इस लड़की कै लड़का होगा नाम धरै किरशन काला

जब जब भार बढ़ै पृथ्वी पै भार उतारण आवे सै
जब जब असुर बढ़ै पृथ्वी प असुर संघारन आवे सै
जब जब भीड़ पड़ै भगतो पै भगत उबारन आवै सै
साधु संत ऋषि मुनियो के काज सवारन आवै सै
शंख चक्र गदा पदम् प्रभु के वैजयंती गल मै माला
इस लड़की कै लड़का होगा नाम धरै किरशन काला

बालक पण मै खेल खेल कै यो सो सो खेल खिलावेगा
गोपनिया की दही खोस कै अपने घरा बुलावैगा
काली देह मै कूद पड़ै यो नाग कै नाथ घलावेगा
अधर्मक वंशी प्रजा वंशी यो तै यादो वंश चलावेगा
मार पूतना तन्नै मारेगा, बिलकुल नहीं करै टाला
इस लड़की कै लड़का होगा नाम धरै किरशन काला

लख्मीचंद पाप की मट्टी जिस दिन ठाड़ी भर जागी
छलक छलक तेरे कपडे भीजै नाड हिलै तलै गिर जागी
सत्पुरषा की नाव भवर सै परली पार उतर जागी
मांगेराम मोह ममता जिस दिन तेरी मर जाएगी
ॐ भूर भव महर लोक और सत पथ का खुल जा ताला
इस लड़की कै लड़का होगा नाम धरै किरशन काला